Giornate degli Autore sailean lehiatzeko aukeratua izan den lan honek Lola Dueñas, Ana Torrent eta Manuel Egozkue aktoreak ditu protagonista. Duero ibaiaren ertzean dauden bi emakumeren arteko topaketa azaltzen du. Vera (Lola Dueñas) gaztea zenean, ezin izan zuen bere semearen ardura hartu eta adopzioan eman behar izan zuen. Urte batzuk geroago, dena ondo atera ote zen jakin nahi izan zuen, eta erakundeek esan zioten ez zela bere espedienterik existitzen. Geroztik semearen bila jarraitzen du. Corari (Ana Torrent), medikuak esan zion ezin izango zuela seme-alabarik eduki eta familia bat osatzeko modu bakarra adoptatzea zela. Corak piano klaseak ematen eta 18 urte betetzear dagoen Egoz seme adoptatua zaintzen igaro du bere bizitza guztia. Orain, hiru pertsonaia hauen bideak -ama bat, seme bat, ama bat- gurutzatzear daude eta topaketa honek hiruen etorkizuna betiko aldatuko du.

‘Sobre todo de noche’ filma Espainia, Portugal eta Frantziaren arteko koprodukzioa da. Bertan, Atekaleun, CSC FILMS eta La Termita Films ekoiztetxeek hartu dute parte. Bestalde, gidoia Isa Campo zuzendariak eta Andrea Queraltek egin dute. Talde teknikoa, berriz, Alazne Ameztoyk (soinua), Maite Arroitajauregik (musika), Ana Pfaffek (edizioa) eta Pablo Palomak (argazkia) osatzen dute.

`Sobre todo de noche´ filmaren estreinaldia Veneziako zinemaldian izango da, irailaren 2an, arratsaldeko 16:45ean, emanaldi berezi batekin.

Giornate degli Autori

Veneziako nazioarteko zinemaldiko sail independente hau Cannesko Errealizadoreen Hamabostaldiaren baliokidea da, eta kalitatezko zinemaren aldeko apustua egiten du. Arreta berezia jartzen dio talentu berriak bilatzeari.

Giornate degli Autoriren helburu nagusia industria zinematografikoan aniztasuna sustatzea da. Ahots sortzaile paregabeak nabarmendu eta film independenteei beren espazioa eskaintzea du helburu.